Sumqayıtda qandonduran cinayətin detalları açıqlandı | Hökm oxundu

2019-cu il iyunun 5-də Sumqayıt şəhəri 12-ci mikrorayon, Üzeyir Hacıbəyli küçəsində yerləşən "Xanə" restoranında baş verən kütləvi dava 1978-ci il təvəllüdlü Tahir Babayevin ölümü ilə nəticələnib. Məhkəmə-tibbi ekspertizasının rəyinə görə, onun ölümünə döş boşluğuna nüfuz etməklə ürəyin zədələnməsindən baş vermiş kəskin qanitirmə səbəb olub.

Həmin gün polisə təslim olan Qubadlı rayon sakini Qədir Səfərov restoranın qarşısında Tahir Babayevi öldürdüyünü etiraf edib. Lakin istintaqın gedişatında onun yalan danışdığı və cinayəti tanışı, Sumqayıt şəhər sakini Turan Hüseynovun əvəzinə boyununa aldığı məlum olub.

İstintaqla müəyyən edilib ki, iyunun 5-i gecə saat 1 radələrində restoranın qarşısında Tahir Babayev və Turan Hüseynov üzərlərindəki bıçaqla bir-birinə zərbələr endiriblər. Tahir sol qolundan xəsarət alan Turana təpik ataraq, əlindəki bıçağı yerə salıb. Buna baxmayaraq, Hüseynov cibindən ikinci kəsici aləti çıxararaq Babayevin bədənin müxtəlif nahiyələrinə ümumilikdə 14 dəfə zərbə vuraraq, onu qəsdən öldürüb.

Bakı Ağır Cinayətlər Məhkəməsinin hökmü ilə Turan Hüseynov 11 il, Qədir Səfərov 2 il 1 ay, Elşad Dadaşov isə 1 il 1 ay müddətinə azadlıqdan məhrum olunublar. Turan Dadaşlıya isə 1 il 2 ay azadlığın məhdudlaşdırılması cəzası təyin edilib.