Sumqayıtda qızını qətlə yetirən ataya hökm oxundu

Sumqayıtda azyaşlı övladını dənizdə boğaraq öldürməkdə şübhəli bilinən Yeşil Ahmet Turan barəsində həbs qətimkan tədbiri seçilib.

Qərar Sumqayıt Şəhər Məhkəməsində hakim Zaur Hacıyevin sədrliyi ilə keçirilən qapalı prosesdə verilib. İbtidai istintaq dövründə Yeşil Ahmet Turan barəsində 4 aylıq həbs qətimkan tədbirinin seçilməsi Sumqayıt şəhər prokurorluğunun təqdimatı əsasında həyata keçirilib.

Xatırladaq ki, martın 31-də Sumqayıt şəhəri ərazisində dəniz sahilində uşaq meyitinin aşkar edilməsi barədə polisə məlumat daxil olub.

Baş Prokurorluğun məlumatına görə, araşdırmalar nəticəsində 1984-cü il təvəllüdlü Yeşil Ahmet Turanın Sumqayıt şəhəri, Zeynalabdin Tağıyev qəsəbəsi ərazisində azyaşlı övladını suda boğaraq qəsdən öldürməsinə əsaslı şübhələr müəyyən edilib.

Faktla bağlı Sumqayıt şəhər prokurorluğunda Cinayət Məcəlləsinin 120.2.9 – təqsirkar şəxs üçün aşkar surətdə köməksiz vəziyyətdə olan adamı öldürmə maddəsi ilə cinayət işi başlanıb. Yeşil Ahmet Turan prokurorluğun qərarı ilə iş üzrə şübhəli şəxs qismində tutulub. Hazırda cinayət işi üzrə ibtidai istintaq davam edir.