Suraxanıdakı dəhşətli hadisənin detalları açıqlandı | Hökm oxundu

Paytaxtın Suraxanı rayonunda kürəkənini öldürməyə cəhddə təqsirləndirilən Yusif Mahmudov və oğlu Allahverdi Mahmudovun cinayət işinin məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Leyla Əsgərova-Məmmədovanın sədrliyi ilə keçirilən son prosesdə ata ilə oğluna hökm oxunaraq onların hər ikisi 11 il 3 ay azadlıqdan məhrum edilib.

Dövlət ittihamçısı da ittiham nitqi ilə çıxış edərək hər iki şəxsin eyni cəza ilə azadlıqdan məhrum edilməsini məhkəməyə təklif etmişdi.

Yusif və Allahverdi Mahmudovlar yeznələri Ağasəlim Məmmədovu aralarında yaranan mübahisə zəminində öldürməyə cəhddə təqsirli bilinirlər. Onlar barəsində Cinayət Məcəlləsinin bir qrup şəxs halında qəsdən adam öldürməyə cəhd maddəsi ilə cinayət işi başlanılaraq ittiham elan edilib. Zərərçəkən kürəkən isə qaynı və qayınatasından şikayətçi olmadığı barədə notariat qaydasında məhkəməyə barışıq ərizəsi göndərərək şikayətçi olmadığını bildirib.