Təhlükə yaradan sürücü aləmi bir birinə qatdı | Polis hərəkətə keçdi

Qaradağ rayonu, Lökbatan-Qobu yolunda hərəkətdə olan avtomobillərdən biri əks istiqamətli nəqliyyat axınının hərəkət zolağına çıxaraq qarşıdan gələn sərnişin avtobusu və digər nəqliyyat vasitələri üçün real təhlükə yaradıb.

Məsələ Baş Dövlət Yol Polisi İdarəsi (BDYPİ) tərəfindən araşdırılıb.

İdarədən verilən məlumata görə, araşdırma nəticəsində yolda özü, sərnişinləri və digər hərəkət iştirakçılarının həyatı üçün təhlükə yaradan sürücünün Emil Cəfərli olduğu müəyyən edilib. O, Yol Patrul Xidməti Alayının əməkdaşları tərəfindən stasionar postda saxlanılıb və barəsində qanunvericiliyə uyğun tədbirlər görülüb.

Qeyd edək ki, BDYPİ bütün sürücülərə müraciət edərək onları yollarda təhlükəli manevrlərə yol verməməyə, digər hərəkət iştirakçılarının həyatına hörmətlə yanaşmağa və qanunvericiliyin tələblərinə ciddi şəkildə riayət etməyə çağırıb.