Təqaüdçülərin bank kartlarını görün necə taladılar | DİN-dən məlumat

Ölkə ərazisində 100-dən artıq vətəndaşın hesabından müxtəlif məbləğlərdə pullarını ələ keçirən qadın saxlanılıb.

Vəsaitlərin əsasən təqaüd kartlarından naməlum şəraitdə oğurlandığı barədə polis orqanlarına çoxsaylı müraciətlər daxil olub.

Daxili İşlər Nazirliyinin əməliyyat-texniki tədbirləri nəticəsində bu əməlləri törətməkdə şübhəli bilinən 28 yaşlı Nuranə Məmmədova taladığı kartlar barədə məxfi məlumatları tanışı Asif Səmədovdan əldə etdiyini bildirib.

Daha sonra o, zərərçəkənlərin kart məlumatlarını müxtəlif mobil tətbiqlərə əlavə edərək qeydiyyatdan keçməklə hesablardakı pul vəsaitlərini nağdlaşdırıb. Eyni əmələ görə artıq həbs olunmuş Asif Səmədovun isə bankomatların yanında dayanaraq vəsaitlərini nağdlaşdırmaqda çətinlik çəkən şəxslərə yardım etmək adı ilə yaxınlaşaraq onların kart məlumatlarını ələ keçirdiyi sübuta yetirilib.

Faktlarla bağlı cinayət işi başlanılıb. Nuranə Məmmədova barəsində məhkəmənin qərarı ilə həbs qətimkan tədbiri seçilib, araşdırma aparılır.