Təqsirləndirilən idmançıların məhkəməsində şahidlər ifadə verdi

MMA və Qrapplinq Federasiyasının qarışıq döyüş növləri üzrə baş məşqçisi Ruslan Əfəndiyev və tələbələri – Xəzər Rüstəmov, Vüqar Kərəmov, Rüfət Əsədov və Tofiq Musayevin cinayət işi üzrə növbəti məhkəmə prosesi keçirilib.

Səbail Rayon Məhkəməsində hakim Azər Tağıyevin sədrliyi ilə keçirilən prosesdə şahid qismində Elgün Tağızadə ifadə verib. O bildirib ki, Bakı Şəhər Halqası Əməliyyat Şirkətində işləyib və “Rizin” Döyüş Federasiyasının keçirdiyi tədbirin təşkilatçısı olub.

Elgün Tağızadə ilə yanaşı, bir neçə şahid ifadə verərək hadisənin birbaşa şahidi olmadıqlarını deyiblər. Onların bildirdiyinə görə, zərərçəkən Həsən Əzizovun idmançı yoldaşları ilə mübahisə etdiyini eşitsələr də, onun üzərində hər hansı xəsarət görməyiblər. Təqsirləndirilən Ruslan Əfəndiyev deyib ki, bu işin böyüməsində üçüncü şəxsin rolu olub.

Şahid Şəhriyar Abbasovun sözlərinə görə, Həsən Əzizov onunla söhbətində şikayət etməsinin səbəbkarının Azərbaycan MMA və Qrapplinq Federasiyasının prezidenti, dünya çempionu Azad Əsgərovun olduğunu etiraf edib. O bildirib ki, bu məsələ barışıq yolu ilə həll olunmalı imiş. Azad Əsgərov Həsəni şikayət etməyə təhrik edib. Bunun da səbəbi nəzərdə tutulan tədbirin keçirilməsinə maneçilik törətmək olub.

Şahidin zərərçəkmişə istinadən dedikləri prokurorda yeni suallar yaradıb. Prokuror iddiaya aydınlıq gətirilməsi üçün Azad Əsgərovun mütləq məhkəmədə dindirilməli olduğunu bildirib. Təqsirləndirilən şəxslər və müdafəçiləri isə ittiham tərəfinin vəsatəti ilə razılaşmayıblar. Təqsirləndirilənlərin vəkilləri prokurorun vəsatətinə etiraz ediblər. Vəkillər deyib ki, zərurət olsaydı, bu məsələ ilkin istintaq zamanı araşdırılardı. İndiki halda isə vəsatətin təmin edilməsi işin uzanmasına səbəb olacaq. Qısa fasilədən sonra prokuror fikrini dəyişərək vəsatətdən imtina etdiyini elan edib.

Daha sonra Həsən Əzizovun ibtidai istintaq zamanı verdiyi ifadəsi elan edilib. Onun ifadəsindən məlum olur ki, zərərçəkənlə Ruslan Əfəndiyev və tələbləri arasında mübahisə yaranıb. Həsən Əzizov özü etiraf edib ki, onların mübahisəsi 20 saniyə ərzində olub. İddia edib ki, onu yumruq və təpiklə vurublar. Bundan sonra cinayət işində olan sənədlər açıqlanıb. Cinayət işində olan ekspert rəylərindən məlum olur ki, Həsən Əzizovun bədən nahiyələrində hər hansı xəsarət olmayıb.

İttiham nitqi ilə çıxış etmək üçün dövlət ittihamçısına söz verilsə də, o, çıxışa hazırlaşmaq üçün vaxt istəyib. Növbəti proses iyulun 1-də davam edəcək.