Tərtər sakini minaya düşdü

Tərtər rayonunda bir nəfər minaya düşərək xəsarət alıb.

Bu barədə Minatəmizləmə Agentliyinin Mətbuat Xidmətindən məlumat verilib. Bildirilib ki, aprelin 18-də Tərtər rayonunun Borsunlu kəndi ərazisində keçmiş təmas xəttinə yaxın, minalardan təmizlənməmiş ərazidə mina partlayışı baş verib.

Partlayış nəticəsində 1980-ci il təvəllüdlü Əsgərov Elnur Asif oğlu xəsarət alıb. O, Tərtər rayon xəstəxanasına yerləşdirilib.

Hadisə ilə bağlı Baş Prokurorluğun Mətbuat xidməti də məlumat yayıb. Bildirilib ki, Tərtər rayonunun Borsunlu kənd sakini E.Əsgərovun mina partlayışı nəticəsində xəsarət alması ilə bağlı Tərtər Rayon Prokurorluğunda araşdırma aparılır.

Həmçinin qeyd edilib ki, 2020-ci ilin 10 noyabr razılaşması ilə döyüş əməliyyatları dayandırılandan bu günə qədər Ermənistan Silahlı Qüvvələrinin basdırdıqları minaların partlaması nəticəsində hərbi qulluqçu və mülki şəxslər olmaqla ümumilikdə 291 nəfər mina qurbanından 51 nəfər həlak olub, 240 nəfər isə müxtəlif dərəcəli bədən xəsarətləri alıb.