Təyyarədə qorxulu anlar yaşandı

ABŞ-də uçuş zamanı təyyarənin təcili çıxış qapısını açmağa cəhd edən və bələdçiyə hücum çəkən sərnişin saxlanılıb.

Belə ki, Los-Anceles - Boston reysi ilə uçan təyyarədə təcili çıxış qapılarından birinin açılmasına cəhd edildiyi barədə həyəcan siqnalı işə düşüb. Bələdçilərdən biri 33 yaşlı Fransisko Severo Torres adlı sərnişini qapının yanında gördüyünü deyib.

Onun sözlərinə görə, F.S.Torres qapını açmağa çalışıb. Bu zaman F.S.Torres əlindəki sınıq metal qaşıqla bələdçiyə hücum çəkib və onu boynundan yaralamağa çalışıb. Sərnişinlərin köməkliyi ilə F.S.Torres zərərsizləşdirilib. Təyyarə Bostonun Loqan Hava Limanına təhlükəsiz eniş etdikdən sonra o, nəzarətə götürülüb.

F.S.Torres ifadəsində qeyd edib ki, bələdçilərdən biri onu öldürməyə çalışıb, buna görə də o, özünü təyyarədən atmaq istəyib. “Uçuş heyətinə müdaxilə etmək və təhlükəli silahlardan istifadə etmək” ittihamı irəli sürülən F.S.Torres martın 9-da məhkəmə qarşısına çıxacaq. Onun günahı sübuta yetirilərsə, ömürlük həbs cəzası ala biləcəyi istisna olunmur.