Uzun müalicə nəticə vermədi | Əməliyyatdan sonra iflic qalan qadın həyatını itirdi - Baku TV

Bakıda 2025-ci ildə keçirdiyi rinoplastika əməliyyatından sonra iflic olan 34 yaşlı Nigar Budaqlı vəfat edib. Uzun müddət müalicə alan N.Budaqlı avqustun 21-də dünyasını dəyişib.

Xatırladaq ki, N.Budaqlı “MedAura” klinikasında burun çəpər əyriliyinin aradan qaldırılması məqsədilə keçirdiyi əməliyyatdan sonra ağır vəziyyətə düşmüşdü. Ailəsinin Baku TV-yə verdiyi açıqlamaya görə, əməliyyat zamanı həkim səhlənkarlığına yol verilib və reklam çarxının çəkilməsi səbəbindən yaranan diqqətsizlik nəticəsində gənc qızın beyni 17 dəqiqə oksigensiz qalıb. Bundan sonra o, iflic vəziyyətində yataq xəstəsi olaraq yaşamını davam etdirirdi.

Hadisə ilə bağlı keçirilən məhkəmə prosesi daha əvvəl yekunlaşmışdı. Məhkəmənin hökmü ilə LOR və estetik cərrah Yaqub Əsədi, eləcə də anestezioloq Cəmilə Əliyeva 3 il müddətinə azadlıqdan məhrum edilib. Həmçinin hər iki şəxsin 2 il müddətinə həkimlik fəaliyyəti ilə məşğul olmasına qadağa qoyulub.

Məhkəmə hökmü çıxarılan zaman söhbət insan sağlamlığının itirilməsindən gedirdisə, artıq ortada itirilmiş bir insan həyatı var. Nigar Budaqlının ailəsi ölüm faktından sonra işin yenidən məhkəmə müstəvisində açılmasını və qiymətləndirilməsini tələb edir.