Xəstə uşaqların pullarını "yeyənlər"lə bağlı yeni detallar üzə çıxdı

Talassemiyalı uşaqlar üçün toplanmış bir milyonluq vəsaiti dələduzluq yolu ilə ələ keçirməkdə təqsirləndirilən şirkət sahibi Nuridə Seyidova və digər iki nəfər – Aynur Bayramova və Aysel Məmmədovanın cinayət işi üzrə növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə Dövlət Əmək Müfəttişliyindən və Dövlət Vergi Xidmətindən məhkəmənin sorğularına gələn cavablar elan olunub.

Dövlət Vergi Xidmətinin cavab məktubunda Nuridə Seyidovanın rəhbərlik etdiyi şirkətdə kassa aparatlarının olmadığı bildirilib.

Hakim sorğunun cavabını əsas götürərək Nuridə Seyidovanın idarə etdiyi şirkətin hesabında 100 minlərlə vəsaitin olduğuna baxmayaraq, hesabatlarda 5-6 min manat pul göstərildiyini məhkəmə iştirakçılarının diqqətinə çatdırıb.

Məhkəmə prosesində zərərçəkən Tural Nəsimiyev təqsirləndirilən şəxslərə qarşı mülki iddia qaldırıb. İddiada hər üç təqsirləndirilənə qarşı 42 min manat maddi, 8 min manat isə mənəvi ziyan tələbi irəli sürülüb.

Məhkəmənin növbəti iclası sentyabrın 11-nə təyin olunub.