Xəzərin sahilində quş cəsədləri aşkarlandı | AQTA-dan açıqlama - Baku TV

Xaçmaz rayonunun Niyazabad kəndi yaxınlığında, Xəzər dənizinin sahilində quşların kütləvi ölümü müşahidə olunub. Sahilboyu əraziyə yüzlərlə batağan quşunun cəsədi səpələnib.

Kənd sakinləri hadisə ilə bağlı jurnalistlərə açıqlama veriblər.

“İllərdir dəniz qırağında yaşayıram, belə mənzərə görməmişəm. Bəlkə də, xəstəlikdən ölüblər”, – sakinlərdən biri söyləyib.

Məsələ ilə bağlı Azərbaycan Qida Təhlükəsizliyi Agentliyindən (AQTA) bildirilib ki, mediada yayılan məlumatlar aidiyyəti dövlət qurumları ilə birgə araşdırılır.

Qurumdan verilən açıqlamada qeyd olunub ki, Agentlik tərəfindən diaqnostik nümunələr götürülərək laborator müayinələrə cəlb edilib. Sınaq nəticələri ilə bağlı ictimaiyyətə əlavə məlumat veriləcək.

Bundan əvvəl isə mediada Bakı, Abşeron və Sumqayıtın dənizkənarı ərazilərində çöl quşlarının tələf olması ilə bağlı yayılan məlumatlar əsasında əraziyə baxış keçirilib və müvafiq araşdırmalar aparılıb. Həmin hallarla bağlı da quş cəsədlərindən nümunələr götürülərək laborator müayinələrə təqdim olunub.

Aparılan sınaqların nəticələrinə əsasən, hər hansı xüsusi heyvan xəstəliyi faktı aşkarlanmayıb.