Yağan güclü leysan yollara, sahələrə ziyan vurdu
Sentyabrın 8-də yağan yağış Goranboyda fəsadlar törədib.
Çaylarda suyun səviyyəsi artıb, dağlardan gələn sel suları 10-a yaxın kəndin ərazisindən keçib. 37 yaşayış məntəqəsində elektrik enerjisinin verilişində fasilələr yaranıb.
Sel suları Azad, Dəyirmanlar kəndləri ərazisində əkin yerlərinə, yeni səpilmiş yonca sahələrinə ziyan vurub. Rayonun Qazançı, Goranlı, Kürəkçay kəndləri ərazisindən axıb keçən sel suları kəndarası yollarda çətinlik yaradıb.
Rayon İcra Hakimiyyəti yanında Fövqəladə Hallar Komissiyası selin fəsad törətdiyi ərazilərdə monitorinqlər aparıb, lazımi texnikaları cəlb etməklə fəsadların aradan qaldırılması istiqamətində tədbirlər həyata keçirib.
Qeyd edək ki, güclü yağışdan sonra rayonun 37 yaşayış məntəqəsində enerji verilişində yaranan problem aradan qaldırılıb.