Yalvardım, amma yolundan döndərə bilmədim... | Şəmkirdə 4 uşaq anası ərini bıçaqladı

Şəmkirdə qadın 16 illik həyat yoldaşını bıçaqlayıb.

Hadisə rayonun Qasımalılar kəndində qeydə alınıb. Tez-tez dalaşdığı deyilən ərlə arvadın növbəti münaqişəsi zamanı qadın həyat yoldaşına bıçaqla xəsarət yetirib.

“Çörəkxana açmaq istəyirdi. Nə qədər yalvardım, yolundan döndərə bilmədim. Anasına, atasına da “uşağınız belə hərəkət edib. Onu bu yoldan döndərin” dedim, heç biri gəlmədi. Bu səhər polisdən zəng gələndə bilmişəm ki, oğlumu bıçaqlayıb. Hamıdan xəbərsiz evin pulunu götürüb oğlanla qaçıb”, – zərərçəkənin anası Dilarə Cəfərova deyib.

Daxili İşlər Nazirliyindən bildirilib ki, Şəmkir Rayon Polis Şöbəsinin əməkdaşları tərəfindən hadisəni törətməkdə şübhəli bilinən şəxs saxlanılaraq istintaqa təhvil verilib:

“Hadisə ilə bağlı müvafiq ekspertiza təyin olunub, araşdırmalar davam etdirilir. Ekspertizanın rəyindən və araşdırmaların nəticəsindən asılı olaraq məsələyə hüquqi qiymət veriləcək”.