Yanacaq daşıyan maşın əvvəlcə aşdı, sonra isə... | Ucardakı faciəvi qəzanın detalları

“Biz gurultu səsinə çıxanda daha bir partlayış oldu”.

Bunu oktyabrın 1-də yanacaqdaşıyan maşının Ucar rayonunun Müsüslü kəndində qəzaya uğraması nəticəsində baş verən yanğından zərər çəkən kənd sakini Qafur Şərifov deyib.

O, yanğın nəticəsində ciddi zərərə uğradığını bildirib:

“Partlayış səsi gəldi, çıxıb gördük ki, tövləmiz yanır. Bir az irəli keçəndə daha bir partlayış oldu. Yanğın zamanı içində altı aylıq xotək, 1500 bağlama ot, beş kub taxta olan tövləm tamamilə yanıb”.

Qəza baş verən əraziyə gələn Fövqəladə Hallar Nazirliyinin (FHN) əməkdaşı Fateh Ağayev jurnalistlərə açıqlamasında bunları deyib:

“Nazirliyin “112” qaynar xəttinə Bakı-Qazax magistral avtomobil yolunun Ucar rayon ərazisindən keçən hissəsində yanacaqdaşıyan maşında yanğın olması ilə bağlı məlumat daxil oldu.

Dərhal FHN-in yanğından mühafizə xidmətinin qüvvə və vasitələri hadisə yerinə cəlb olunub. İlkin bölməmiz əraziyə çatdıqda əməliyyat şəraiti qiymətləndirilərkən müəyyən edilib ki, Ağsu rayon sakininin yanacaqdaşıyan maşını idarəetməni itirərək yolun kənarına aşıb və nəticədə qısa zaman kəsiyində yanğın hadisəsi baş verib.

Qüvvə və vasitələrin köməyi ilə yanğının söndürülməsinə başlanılıb. Yaxınlıqda olan vətəndaşa məxsus tikilidə də yanğın hadisəsi baş verib. Yanğın tərəfimizdən çevik reaksiya verilərək məhdudlaşdırılıb və söndürülüb. Yanğın nəticəsində yanacaqdaşıyan avtomobilin sürücüsünün cəsədi aşkar edilib.

Ümumilikdə nəticədə 40 ton yanacaq və vətəndaşa məxsus ümumi sahəsi 100 kvadratmetr olan yardımçı tikili yanğından mühafizə olunub”.