Yasamaldakı söküntü ilə bağlı rəsmi açıqlama | Alatavada nə baş verir?

Paytaxtın Yasamal rayonunda, hər kəsin Alatava kimi tanıdığı ərazidə yaşayış olan evin sökülməsi ilə bağlı sosial şəbəkələrdə görüntülər paylaşılıb.

Məsələ ilə bağlı Daxili İşlər Nazirliyindən bildirilib ki, tikinti şirkətinin iş icraçısı və ekskavator sürücüsü saxlanılıb.

Faktla bağlı Cinayət Məcəlləsinin müvafiq maddəsi ilə cinayət işi açılıb, araşdırma aparılır.

Fövqəladə Hallar Nazirliyindən isə bildirilib ki, "112" qaynar telefon xəttinə Yasamal rayonu ərazisində vətəndaşın dağıntı altında qalması barədə məlumat daxil olub və dərhal FHN-in xilasediciləri əraziyə cəlb edilib:

"Əməliyyat şəraiti qiymətləndirilərkən dağıntı altında qalanın olmadığı müəyyən edilib".

Dövlət Şəhərsalma və Arxitektura Komitəsindən qeyd olunub ki, söküntü işləri ilə əlaqədar Bakı Şəhər Memarlıq və Şəhərsalma Baş İdarəsi əraziyə baxış keçirib və bu işlərin müvafiq icazə olmadan aparıldığı müəyyən edilib:

"Aparılan işlər vətəndaşlarla tam razılıq əldə edilmədən və mövcud qanunvericiliyin tələblərinə zidd aparıldığı üçün Baş İdarə tərəfindən aidiyyəti qurumlarla birlikdə dayandırılıb və aktlaşdırılıb. Qanunsuz işlər zamanı vətəndaşların mülklərinə dəymiş ziyanla bağlı müvafiq araşdırma aparılması üçün materiallar hüquq-mühafizə orqanlarına təqdim ediləcək".