Zaqatalada bir gündə iki faicəvi ölüm | Həkimdən təcili açıqlama

Zaqatalada bir sutkada 2 körpə ölümü qeydə alınıb.

Belə ki, Gözbarax kənd sakini, 1992-ci il təvəllüdlü şəxs yanvarın 7-si saat 11:10-da 38 həftəlik hamiləlik diaqnozu ilə Zaqatala Rayon Mərkəzi Xəstəxanasına planlı qeysəriyyə əməliyyatı üçün müraciət edib.

Xəstəxanadan bildirilib ki, saat 15:30-da əməliyyat icra edilib, yaşama qabiliyyətinə mane olan çoxsaylı qüsurlar və anomaliyalarla, çəkisi 2800 qram, cinsi qız olan diri körpə (ağır vəziyyətdə) dünyaya gəlib. İki saat sonra göstərilən bütün tibbi müdaxilələrə baxmayaraq, körpədə ölüm faktı qeydə alınıb.

Ölümün dəqiq səbəbini müəyyən etmək üçün körpənin meyiti müayinə olunması üçün aidiyyəti üzrə təhvil verilib.

Zaqatalada 2-ci ölüm faktı isə yanvarın 8-də qeydə alınıb. Rayonun Danaçı kənd sakini olan 2 yaşlı Maxac Katmayev Xəstəxananın Təcili Yardım şöbəsinə gətirilib.

Müayinə zamanı azyaşlıda qızdırma, viruz infeksiyası və pnevmoniya əlamətlərinin olduğu müəyyənləşib. Azyaşlı Reanimasiya şöbəsinə köçürülüb. Aparılan həkim müdaxilələrinə baxmayaraq, axşam saat 19:00 radələrində uşaqda bioloji ölüm faktı qeydə alınıb.

Hər iki faktla bağlı Zaqatala Rayon Prokurorluğunda araşdırma aparılır.