Zaqatalada valideynlərinin gözündən yayınan azyaşlı həyatını itirdi

Zaqatalada 2 yaşlı uşaq çayda boğulub. Hadisə iyulun 12-si günorta saatlarında Tala çayının rayonun Yuxarı Tala kəndinin inzibati ərazisində, Meşleş dərə adlanan hissəsində baş verib.

Məlumata görə, rayon sakini Əfəndi İsmayılov ailəsi ilə birlikdə istirahət etmək üçün çay kənarına gedib. Valideynlərinin gözündən yayınan 2 yaşlı Səfiyyə İsmayılova çaya düşüb və azyaşlını su aparıb.

Axtarışlar nəticəsində uşaq sudan çıxarılaraq hadisə yerinə çağırılmış Təcili və Təxirəsalınmaz Tibbi Yardım Mərkəzinin həkim briqadasına təhvil verilib.

TƏBİB-dən bildirilib ki, 2023-cü il təvəllüdlü azyaşlı suda boğulma səbəbi ilə Zaqatala Rayon Mərkəzi Xəstəxanasının Təcili tibbi yardım şöbəsinə aparılıb.

“Şəxsin xəstəxanaya qədər ölüm faktı qeydə alınıb. Ailə üzvlərinin təkidi ilə azyaşlıya reanimasiya tədbirləri icra edilsə də, ölüm faktı təsdiqlənib”, – deyə məlumatda qeyd edilib.

Meyit müayinə olunmaq üçün Məhkəmə-Tibbi Ekspertiza və Patoloji Anatomiya Birliyinin Zaqatala rayon şöbəsinə təhvil verilib. Faktla bağlı Zaqatala Rayon Prokurorluğunda araşdırma aparılır.