Adrian Mutu: “Neftçi” mənə görə Azərbaycanın ən böyük klubudur

“Neftçi”ni seçməyimdə 2 səbəb var: əvvəla “Neftçi” mənə görə ölkənin ən böyük klubudur. İkincisi “Neftçi”nin qarşıdakı il üçün nəzərdə tutulan layihəsi məni cəlb etdi. Əsas hədəf komandanı yenidən zirvəyə qaytarmaqdır”.

Bu sözləri ağ-qaraların yeni baş məşqçisi Adrian Mutu “CBC Sport”a müsahibəsində deyib.

44 yaşlı rumıniyalı mütəxəssis bildirib ki, klub təkcə ölkə çempionluğu haqqında fikirləşməməlidir, həm də Azərbaycanı Avropada layiqli təmsil etməlidir.

Mutu qeyd edib ki, danışıqlar zamanı klubun məqsədləri və müasir futbolun tələblərinə cavab verən inkişaf planı onda gözəl təəssürat yaradıb. Buna görə də, o, ötən mövsümlə müqayisədə komandanı daha yaxşı nöqtəyə çatdırmağa çalışacaq.

Qeyd edək ki, Neftçi ilə 2 illik müqavilə imzalayan Adrian Mutu məşqçilik karyerasına 37 yaşında başlayıb. Müxtəlif vaxtlarda ölkəsinin “Voluntari”, “Krayova” və “Rapid Buxarest” kollektivlərində işləyən Adrian həm də Rumıniyanın 21 yaşadək futbolçulardan ibarət yığmasını çalışdırıb.