Atıcılıq üzrə dünya çempionatında növbəti qalib məlumdur

Bakıda keçirilən atıcılıq üzrə 53-cü dünya çempionatında qadınlar arasında 10 metr məsafəyə pnevmatik tüfəngdən atəş üzrə yarışda qalibin adına aydınlıq gəlib.

Çinli Jiayu Han bu kateqoriyada qızıl medalın sahib olub. Ondan az fərqlə geri qalan həmyerlisi Jiin Vanq gümüş medal qazanıb. Bürünc mükafatı isə Hindistan təmsilçisi Mehuli Qoş əldə edib.

Pnevmatik tüfəngdən atəş üzrə komanda yarışının ən yaxşı nəticəsini isə Hindistan təmsilçiləri göstəriblər. Çin və Almaniya nümayəndələri müvafiq olaraq 2-ci, 3-cü yerlərlə kifayətləniblər.

Qeyd edək ki, sözügedən yarışda qalib gələn Çin, Hindistan və İsveçrə təmsilçiləri “Paris-2024” Yay Olimpiya Oyunlarına lisenziya qazanıblar. Həmçinin turnirdə 5-ci yeri tutan iranlı Şermineh Çehel Amirani də “Paris-2024”ə vəsiqə qazanmaqla ölkəsini sevindirib. O, pnevmatik tüfəngdən atəş açma yarışlarında bu uğura imza atan ilk iranlı idmançı olub.

Yarışdan sonra açıqlama verərək çox sevincli olduğunu, öz çıxışından razı qaldığını bildirən Şermineh Çehel Azərbaycanda təhlükəsizliklərinin yüksək səviyyədə olduğunu və ölkəmizi çox bəyəndiyini bildirib.

Xatırladaq ki, avqustun 14-də start götürən atıcılıq üzrə dünya çempionatı sentyabrın 1-dək davam edəcək. Atıcılıq mərkəzində təşkil olunan turnirdə 1239 idmançı mübarizə aparır.