Atıcılıq üzrə dünya çempionatında Paris Olimpiadasına son lisenziyalar oynanılıb

Bakıda keçirilən atıcılıq üzrə dünya çempionatında Paris-2024 Olimpiadasına son lisenziyalar oynanılıb.

Yarışın növbəti günündə stend atıcılığının səngər növündə qaliblər müəyyənləşib. Qadınlar arasında yarışda 1-ci yeri Çin Taypeyini təmsil edən Lin Yi Çun tutub. O, həlledici mərhələdə London-2012 olimpiadasının qalibi italiyalı Cessika Rossini üstələyib.

Almaniyalı Ketrin Murçe isə 3-cü nəticə göstərib. Mübarizənin yekununda Çin Taypeyi, Almaniya, Çin və Hindistan atıcıları Paris-2024 Yay Olimpiya Oyunlarına lisenziya əldə ediblər.

Stend atıcılığının səngər növü üzrə kişilər arasında yarışda xorvatiyalı Covanni Çernoqoras qızıl medal qazanıb. Slovakiyalı Marian Kovakosi və küveytli Xaled Almudhaf isə müvafiq olaraq gümüş və bürünc mükafata yiyələniblər.

Qeyd edək ki, Bakıda keçirilən atıcılıq üzrə 53-cü dünya çempionatında 100-dən artıq ölkədən 2000-dək idmançı və nümayəndə iştirak edir. Turnirə sentyabrın 1-i yekun vurulacaq.