AVRO-2024: Azərbaycan millisi Avstriya yığmasını qəbul edib

Azərbaycan millisi AVRO-2024-ün seçmə mərhələsində növbəti görüşünü keçirib.

Yığmamız 6-cı turun matçında Avstriya futbolçularını qəbul edib.

Tofiq Bəhramov adına Respublika stadionunda baş tutan oyunun ilk hissəsi bərabər səviyyəli mübarizə ilə əlamətdar olub. Fasiləyədək qapılar qarşısında təhlükəli vəziyyətlər yaransa da, hesab açılmayıb.

2-ci yarının əvvəlində isə Marsel Zabitser qonaqlar irəli çıxarıb. Görüşün qalan hissəsi gərginliyi ilə diqqət çəkib. Nəticədə yunanıstanlı baş hakim 8 futbolçuya sarı vərəqə göstərib.

Son saniyələrdə isə Qvido Bürqştaller komandasını azlıqda qoyub. Bununla belə avstriyalılar qələbə hesabını qoruya biliblər.

Millimizə 1-0 hesabı ilə qalib gələn Avstriya yığması xallarının sayını 16-ya çatdıraraq vaxtından əvvəl AVRO-2024-ün final mərhələsinə vəsiqə qazanıb. 4 xalı olan Azərbaycan seçməsi isə F qrupunda 4-cü yerdədir.

Qeyd edək ki, futbolçularımız seçmə mərhələnin növbəti oyunu çərçivəsində noyabrın 11-i İsveç kollektivini qəbul edəcək.