Avropa çempionatının qalibinin adına aydınlıq gəlib

AVRO-2024-də qalib müəyyənləşib.

Final görüşündə İspaniya və İngiltərə milliləri qarşılaşıblar.

Matçın ilk hissəsində qapılar önündə təhlükəli vəziyyətlər yaransa da, hesab açılmayıb.

İkinci yarıya İspaniya komandası yaxşı başlayıb. 47-ci dəqiqədə “Qırmızı Furiya”nın gənc ulduzu Niko Uilyams britaniyalıların qapısını dəqiq nişan alıb. Lakin İngiltərə seçməsi tarazlığı bərpa etməyi bacarıb.

73-cü dəqiqədə Koul Palmer fərqlənib. Çox keçmədən ispanlar yenidən hesabda irəli çıxıblar. Mikel Oyarsabalın qolu həm də yekun nəticəni müəyyənləşdirib. Oyunda 2-1 hesablı qələbə qazanan İspaniya millisi tarixində 4-cü dəfə Avropa çempionu olub. Bu göstərici ilə komanda həm də yeni rekord müəyyənləşdirib. İngiltərə yığması isə ardıcıl ikinci dəfə bu turnirin finalından məğlub ayrılıb.