AVRO-2024 | Çexiya - Türkiyə oyununda gərgin mübarizə

AVRO-2024-də qrup mərhələsinə yekun vurulub.

F qrupunda yer alan Türkiyə millisi sonuncu turda Çexiya ilə qarşılaşıb.

Hamburqda keçirilən matç ilk dəqiqələrdən gərginliyi ilə diqqət çəkib. Nəticədə artıq 20-ci dəqiqədə çexiyalılar azlıqda qalıblar.

Antonin Barak qısa vaxt ərzində 2-ci dəfə sarı vərəqə ilə cəzalandırılıb. Hesab isə 51-ci dəqiqədə açılıb. Hakan Çalhanoğlu “ay-ulduzlar”ı irəli çıxarıb. Lakin ruhdan düşməyən Çexiya komandası 66-cı dəqiqədə Tomaş Souçekin qolu ilə tarazlığı ilə bərpa edib. Bununla belə, əsas vaxta artırılan dəqiqələrdə Cenk Tosun fərqlənərək Türkiyə millisinə 2-1 hesablı qələbə qazandırıb.

Bu qrupun digər oyununda isə gözlənilməz nəticə qeydə alınıb. Belə ki, yarışın favoritlərindən Portuqaliya ilə qarşılaşan Gürcüstan kollektivi 2-0 hesablı qələbə qazanıb. Görüşdə hesabı 2-ci dəqiqədə Xviça Kvaratsxeliya açıb. 57-ci dəqiqədə isə Jorj Mikautadze 2-ci topu portuqalların qapısından keçirib.

Qrup mərhələsinin yekununa əsasən, ilk 3-lükdə qərarlaşan Portuqaliya, Türkiyə və Gürcüstan 1/8 finala adlayıblar. 4-cü yeri tutan Çexiya isə turnirlə vidalaşıb.