AVRO-2024-də III turun növbəti matçları baş tutacaq

Almaniyada keçirilən Avropa çempionatında bu gün qrup mərhələsinin növbəti görüşləri baş tutacaq.

Əvvəlcə Bakı vaxtı ilə saat 20:00-da D qrupu çərçivəsində 2 oyun olacaq.

Dortmunddakı “Siqnal İduna Park” arenasında Fransa və Polşa milliləri qarşılaşacaq. Bu görüşü italiyalı referi Marko Quida idarə edəcək.

Eyni saatda qrupun digər oyununda isə Niderland və Avstriya yığmaları münasibətlərə aydınlıq gətirəcək. Berlindəki “Olimpiyaştadion”da keçiriləcək matçda ədaləti İvan Krujlyakın başçılıq etdiyi slovakiyalı hakimlər briqadası qoruyacaq.

Qeyd edək ki, iki turdan sonra D qrupunda hərəyə 4 xalı olan Niderland və Fransa yığmaları 1-ci, 2-ci pillələrdə qərarlaşıblar. 3 xal toplayan Avstriya 3-cü yerdədir. Xalsız qalan və pley-off imkanlarını itirən Polşa isə sonuncudur.

Bu gün həm də C qrupunda mübarizəyə yekun vurulacaq. Turnirdə hələ ki inamsız oyunla diqqət çəkən İngiltərə millisi Sloveniyanı sınağa çəkəcək. Saat 23:00-da başlayacaq görüşü fransalı referi Kleman Türpenin briqadası idarə edəcək. Eyni vaxtda start götürəcək qrupun digər matçında isə Danimarka və Serbiya kollektivləri qarşılaşacaq. Bu matçın baş hakimi isə fransalı Fransua Leteksye olacaq.