AVRO-2024-ün bütün 1/4 finalçıları məlum olub

Almaniyada keçirilən AVRO-2024-də 1/8 finala yekun vurulub. Artıq 1/4 finala adlayan bütün komandalar məlumdur.

Bu mərhələnin ilk oyunları iyulun 5-i keçiriləcək. Əvvəlcə Ştutqart şəhərində yarışın favoritlərindən İspaniya və Almaniya yığmaları üz-üzə gələcəklər. Bu görüş saat 20:00-da başlayacaq.

3 saat sonra isə Portuqaliya və Fransa yığmaları arasında qarşılaşma start götürəcək. Hamburqun “Folksparkştadion” arenasında baş tutacaq matçın qalibi yarımfinalda İspaniya – Almaniya cütünün güclüsü ilə üz-üzə gələcək.

1/4 finalın digər oyunları iyulun 6-na nəzərdə tutulub. Bakı vaxtı ilə saat 20:00-da başlayacaq görüşdə Niderland seçməsi Türkiyə futbolçularını sınağa çəkəcək. Mərhələnin son qarşılaşmasında isə İngiltərə və İsveçrə yığmaları münasibətlərə aydınlıq gətirəcək.

Qeyd edək ki, iyunun 14-ü başlayan qitə çempionatı iyulun 14-dək davam edəcək. Yarışın final matçı Berlinin “Olimpiyaştadion” arenasında keçiriləcək.