AVRO-2024-ün seçmə mərhələsində növbəti matçlar olub
Türkiyə millisi AVRO-2024-ün seçmə mərhələsində 2-ci oyununu keçirib.
İlk turda səfərdə Ermənistanı məğlub edən “ay-ulduzlular” bu dəfə Xorvatiya kollektivini qəbul edib. Hesabı 20-ci dəqiqədə Mateo Kovaçiç açıb. Fasilə ərəfəsində fərq 2-yə yüksəlib. Bu dəfə də M.Kovaçiç hədəfi dəqiq nişan alıb.
Türkiyə yığması 2-ci hissədə məğlubiyyətdən qurtulmağa çalışsa da, bu nəticə verməyib. Oyun Xorvatiya seçməsinin 2-0 hesablı qələbəsi ilə başa çatıb. Bu nəticədən sonra 4 xalı olan Xorvatiya yığması Uelslə birlikdə D qrupunda 1-ci, 2-ci yerləri bölüşdürür, 3 xalı olan Türkiyə komandası isə 3-cüdür.
Gözlənilməz nəticələrdən biri Qlazqoda qeydə alınıb. A qrupunun favoriti İspaniya millisi Şotlandiya futbolçularının qonağı olub. “Hempden Park” arenasında keçirilən görüş meydan sahiblərinin 2-0 hesablı qələbəsi ilə başa çatıb.
Britaniyalıların heyətində Skott Maktomini dublla yadda qalıb. Bu qalibiyyətdən sonra xallarının sayını 6-ya çatdıran Şotlandiya yığması qrupa başçılıq edir. 17 ildən sonra ilk dəfə Avropa çempionatının seçmə mərhələsində fərqlənə bilməyən İspaniya isə 3 xalla 2-ci yerdədir.