Avropa çempionatında “Gürcüstan nağılı”

AVRO-2024-ün final mərhələsinə vəsiqə qazanaraq hər kəsi təəccübləndirən Gürcüstan millisi daha bir tarixi uğura imza atıb.

F qrupunda Portuqaliya, Türkiyə və Çexiya kimi iddialı yığmalarla mübarizə aparan Gürcüstan seçməsi yarışın 1/8 finalına adlamağı bacarıb. Özü də qrup mərhələsinin son turunda iddialı pireneyliləri 2-0 hesabı ilə məğlub etməklə.

Bu matç həm də Gürcüstan kollektivinin əsas ulduzu Xviça Kvaratsxeliya üçün də əlamətdar olub. Türkiyə və Çexiya ilə görüşlərdə ümidləri doğrultmayan 23 yaşlı futbolçu Portuqaliya ilə oyunda artıq 2-ci dəqiqədə fərqlənərək tarixi qələbənin təməlini qoyub.

Gürcüstan xalqının millinin pley-offa yüksəlməsini qeyd etdiyi bir vaxtda komandanın baş məşqçisi Villi Sanyolu daha çətin tapşırıq gözləyir. Onun futbolçuları növbəti mərhələdə turnirin əsas favoriti kimi göstərilən İspaniya ilə qarşılaşacaq. İyunun 30-da keçiriləcək matçda onun kollektivinin imkanları az olsa da, qrup mərhələsindəki çıxışı nəzərə aldıqda Gürcüstan yığmasının asan təslim olmayacağını indidən söyləmək olar.