Avropa liqasında 1/8 finala yekun vurulub

Avropa liqasında 1/8 final mərhələsinə yekun vurulub. Bol qollu matçlardan biri “Liverpul” və “Sparta Praqa” arasında olub.

“Enfild” stadionunda keçirilən görüşdə “qırmızılar” Nunyes, Klark, Salah və Qakponun topları sayəsində fasiləyə 4-1 hesabı ilə irəlidə yollanıblar. 2-ci hissədə isə mersisaydlılar daha iki qol vurublar. Dubl edən Qakpo ilə yanaşı, Soboslai fərqlənib: 6-1.

İlk oyun “Liverpul”un 5-1 hesablı qələbəsi ilə bitdiyi üçün iki görüşün yekununda 11-2 hesabı ilə güclü olan İngiltərə klubu mərhələ adlayıb.

Dumanlı Albionun daha bir komandası “Vest Hem” də azarkeşlərini sevindirib. “Frayburq”u qəbul edən “çəkicdöyənlər” ilk hissəni Paketa və Bouenin qolları ilə 2-0 hesabı ilə öndə başa vurublar.

2-ci yarıda isə London komandasından Kudus dubl edib. Daha bir epizodda Kressvelin zərbəsi dəqiq olub. “Vest Hem” – “Frayburq”: 5-0. İki görüşün nəticəsinə görə 5-1 hesabı ilə üstün olan “Vest Hem” yarışın 1/4 finalına yüksəlib.

Növbəti mərhələnin daha bir iştirakçısı “Brayton” və “Roma” arasında mübarizədə müəyyənləşib. Qarşılaşma Uelbekin yeganə qolu sayəsində 1-0 hesabı ilə bitsə də, bu, “qağayılar”ın mərhələ adlaması üçün kifayət etməyib. İlk matçda 4-0 hesabı ilə qalib gələn “canavarlar" 1/4 finala vəsiqə qazanıblar.