Bakıda təşkil olunacaq minifutbol üzrə dünya çempionatının püşkatma mərasimi keçirilib

Bakıda təşkil olunacaq minifutbol üzrə dünya çempionatının püşkatma mərasimi keçirilib.

Tədbirdə Azərbaycan və Dünya Minifutbol Federasiyasının, AFFA-nın, Gənclər və İdman Nazirliyinin rəsmiləri, həmçinin futbol ictimaiyyətinin bir sıra tanınmış simaları iştirak ediblər.

Mərasimə Azərbaycan Respublikasının Dövlət Himninin səsləndirilməsi ilə start verilib. Ardınca dünya çempionatının kuboku ictimaiyyətə təqdim olunub.

Daha sonra Dünya Minifutbol Federasiyasının prezidenti Filip Juda, gənclər və idman naziri Fərid Qayıbov, AFFA prezidenti Rövşən Nəcəf, həmçinin Azərbaycan Minifutbol Federasiyasının prezidenti Orxan Məmmədovun çıxışlarına yer verilib.

Yekunda minifutbol üzrə dünya çempionatının püşkü atılıb. Azərbaycan mundiala ev sahibliyi etdiyi üçün yığmamız A qrupunda yer alıb. Elşad Quliyevin rəhbərlik etdiyi komanda Mavritaniya, Sloveniya və Bəhreynlə mübarizə aparacaq.

Qeyd edək ki, 32 komandanın iştirak edəcəyi dünya çempionatı mayın 21-dən iyunun 1-dək Bakıda keçiriləcək.