Basketbolçularımız Ermənistan komandalarını məğlub ediblər

18 yaşadək qızlardan ibarət basketbol yığmamız Ermənistan seçməsi üzərində parlaq qələbə qazanıb.

Kosovonun paytaxtı Priştina şəhərində keçirilən qarşılaşma Avropa çempionatının “C” divizionu çərçivəsində baş tutub.

Oyuna yaxşı başlayan komandamız ilk periodda 19-15, 2-ci hissədə isə 17-11 hesabı ilə güclü olub. Qalan vaxtda da təşəbbüsü əldən verməyən qızlarımız yekunda 68-42 hesablı qalibiyyət əldə ediblər. Görüşün ən məhsuldar basketbolçusu 21 xal və 7 ribaundla yadda qalan yığmamızın üzvü Deniz Gökçöl olub. Bu nəticələrdən sonra basketbolçularımız qrup lideri kimi yarımfinala yüksəliblər.

Eyni gündə 18 yaşadək oğlanlardan ibarət seçməmiz də Ermənistan kollektivini məğlub edib. Albaniyanın Elbasan şəhərində qitə çempionatının “C” divizionunda keçirilən qarşılaşma təmsilçilərimizin 76-69 hesablı qələbəsi ilə yekunlaşıb. Komandamızın uğurunda 18 xal və 5 assist müəllifi olan Derin Berköz əsas pay sahiblərindən olub.

Qeyd edək ki, bu qalibiyyət sayəsində basketbolçularımız qrupu 1-ci yerdə başa vuraraq yarımfinala adlayıblar.