Bu gün AVRO-2024-də daha 4 matç olacaq
Bu gün AVRO-2024-ün qrup mərhələsinə yekun vurulacaq.
Əvvəlcə Bakı vaxtı ilə saat 20-də E qrupu çərçivəsində oyunlar olacaq. Frankfurt şəhərində keçiriləcək matçda Slovakiya və Rumıniya yığmaları üz-üzə gələcək. Bu matçın baş hakimi almaniyalı Daniel Zibert olacaq.
Ştutqart şəhərində baş tutacaq oyunda isə Ukrayna və Belçika seçmələri qarşılaşacaq. Görüşü Entoni Teylorun rəhbərlik etdiyi ingiltərəli hakimlər briqadası idarə edəcək.
Qeyd edək ki, hazırda E qrupunda olan bütün komandalar pley-off imkanlarını qoruyur.
Qrup mərhələsinin son oyunları saat 23-də F qrupu çərçivəsində keçiriləcək. Hamburq şəhərində təşkil olunacaq matçda Türkiyə millisi Çexiya yığmasını sınağa çəkəcək. “Folksparkştadion”da baş tutacaq matçı rumıniyalı İştvan Kovaç idarə edəcək. Digər görüşdə isə pley-offa vəsiqəni təmin edən Portuqaliya kollektivi Gürcüstan millisi ilə üz-üzə gələcək. Helzenkirxendə keçiriləcək matçda isveçrəli Sandro Şererin hakimlər briqadası işləyəcək.