Çempionlar liqası: 1/8 finalın cavab oyunları keçirilir

UEFA Çempionlar liqasında 1/4 finalın ilk iştirakçıları müəyyənləşib.

1/8 finalın birinci matçında səfərdə PSJ-ni 1-0 hesabı ilə məğlub edən “Liverpul” bu dəfə rəqibini “Enfild” arenasında qəbul edib.

Oyunun əsas vaxtında yalnız 1 qol vurulub. Usman Dembelenin 12-ci dəqiqədə fərqlənməsindən sonra ümumi hesab bərabərləşib: 1-1.

Əlavə vaxtda da qol olmadığından penalti zərbələri yerinə yetirilib. Burada isə parislilər daha dəqiq olublar. Nəticədə Fransa klubu adını növbəti mərhələyə yazdırıb.

“Benfika” ilə Portuqaliyada keçirilən ilk görüşdə azlıqda qalmasına baxmayaraq, 1-0 hesablı qələbə qazanan “Barselona” bu dəfə də qalib gəlib. İspaniyadakı qarşılaşmada “blauqrana”nın heyətində dubl edən Rafinya ilə yanaşı, Lamin Yamal qapını dəqiq nişan alıb. Qonaqların gücü yalnız Nikolas Otamendinin təsəlli topuna çatıb.

Almaniya nəhənglərinin mübarizəsində ilk oyunda olduğu kimi yenə “Bavariya” güclü olub. “Alyans Arena”da 3-0 hesablı qələbə qazanan “rekordmayster” “Bayer”in meydanında 2-0 hesablı qalibiyyət əldə edib. Komandanın qolları Harri Keyn və Alfonso Deyvisin aktivindədir.

Növbəti mərhələdə “Bavariya”nın rəqibi İnter olacaq. “Feyenoord”la Niderlanddakı matçda 2 cavabsız topla qələbəyə sevinən “neradzurri” bu dəfə də azarkeşlərini sevindirib. İtaliya komandasının qollarını Markus Türam və Hakan Çalhanoğlu vurublar.

İki oyunun yekununda 4-1 hesabı ilə güclü olan “İnter” 1/4 finalda “Bavariya” ilə ilk qarşılaşmasını səfərdə keçirəcək. Bu görüş aprelin 8-i Münxendə, cavab matçı isə aprelin 15-i Milanda təşkil olunacaq.