Çingiz Əlləzov Marat Qriqoryanı məğlub etməsindən danışdı

“One Championship” təşkilatında erməni əsilli Marat Qriqoryana qalib gələrək çempionluq kəmərini müdafiə edən Çingiz Əlləzov döyüşlə bağlı fikirlərini Baku TV ilə bölüşüb.

“Bu döyüşü çox gözləyirdim. Sonuncu dəfə 10 il əvvəl qarşılaşmışdıq. Revanş almaq baxımından bu görüş mənim üçün olduqca önəmli idi. Mən demişdim ki, kikboksinqdə 1 nömrə olacağam. Həm o, həm də mən son döyüşlərdə çox güclü rəqibləri məğlub etmişdik, buna görə də Marat Qriqoryan üzərində qələbə mənim üçün çox vacib idi və biz bunu bacardıq. Mənə dəstək olan Azərbaycan xalqına təşəkkür etmək istəyirəm”, – deyə o bildirib.

Xatırladaq ki, Çingiz Əlləzov dünyaca məşhur “One Championship” təşkilatının kəmərinə bu ilin yanvarında Superbon Sinqha Mavinə qalib gəlməklə sahib çıxıb. Ötən həftə sonu baş tutan döyüşdə isə o, hakimlərin qərarına əsasən, Marat Qriqoryanı məğlub edərək titulunu uğurla müdafiə edib.