Dünya çempionatında qalibin adına aydınlıq gəlib

Futbol üzrə dünya çempionatında qalibin adına aydınlıq gəlib. “Lusail” stadionunda keçirilən final görüşündə Argentina və Fransa milliləri üz-üzə gəliblər.

İlk dəqiqələrdən cənubi amerikalıların daha yaxşı təsir bağışladığı matçda hesab 23-cü dəqiqədə açılıb. Lionel Messi penaltini dəqiq yerinə yetirib. 13 dəqiqə sonra fərq 2-yə yüksəlib. Anxel Di Mariya əks-hücumu dəqiq zərbə ilə tamamlayıb. İlk hissə argentinalıların 2-0 hesab üstünlüyü ilə başa çatıb.

2-ci yarıda təzyiqi artıran Fransa yığması 80-ci dəqiqədə toplardan birinin əvəzini çıxıb. Kilian Mbappe 11 metrlik cərimə zərbəsini dəqiq yerinə yetirib. Cəmi 1 dəqiqə sonra hesab bərabərləşib. Mbappe özünün və komandasının 2-ci qolunu vurub. Bundan sonra da təhlükəli vəziyyətlər olsa da, əsas vaxt 2-2 hesabı ilə yekunlaşıb.

Əlavə vaxtda tərəflər hərəyə bir dəfə fərqləniblər. Messinin qoluna avropalılar Mbappenin topu ilə cavab veriblər: 3-3. Qalibi müəyyənləşdirən penaltilər seriyasında isə Argentina seçməsi 4-2 hesabı ilə qalib gələrək tarixində 3-cü dəfə dünya çempionu olub.