Dünya çempionu Lamiyə Vəliyeva qələbəsini əsgər salamı ilə qeyd etməsindən danışdı

“Qələbəmi xalqımıza həsr edirəm. Əsgər salamı vermək barədə əvvəlcədən düşünməmişdim. Bu, həmin an ürəyimdən gəldi”.

Bunu Fransanın paytaxtı Parisdə keçirilən para-atletika üzrə dünya çempionatında iki qızıl medal qazanan Azərbaycan idmançısı Lamiyə Vəliyeva Heydər Əliyev Beynəlxalq Aeroportunda jurnalistlərə açıqlamasında deyib.

100 və 400 məsafələrə qaçışda birinci yeri tutaraq Paris-2024 Yay Paralimpiya Oyunlarına lisenziya əldə edən L.Vəliyeva buna görə sevincli olduğunu bildirib: “Parisə yollananda bu uğuru qazanacağıma inanırdım. Çünki yaxşı hazırlıq keçirmişdim. Bütün yarışlarımı ciddi qəbul edirəm və Vətənimi layiqli şəkildə təmsil etməyə çalışıram. Hər gün məşq edirəm ki, bu cür yarışlarda gücümü göstərə bilim. Sübut etmək istəyirəm ki, millətimiz həmişə ön sırada olmalıdır. Özümlə çox fəxr edirəm”.