Eduard Məmmədov 11-ci dəfə Avropa Çempionatında qalib gəlib

Azərbaycan Respublikası Daxili İşlər Nazirliyinin İdman Cəmiyyətinin İdman-təlim şöbəsinin rəisi, polis polkovnik-leytenantı, dəfələrlə dünya və Avropa çempionu Eduard Məmmədov növbəti dəfə tarixi uğura imza atıb.

Titullu idmançımız Yunanıstanda keçirilən kikboksinqin WAKO versiyası üzrə Avropa çempionatında 2 qızıl medal qazanıb.

“Master Class” kateqoriyasında 63 kq çəki dərəcəsində mübarizə aparan Eduard Məmmədov Afina şəhərində keçirilən yarışda 2 versiyada döyüşüb. “Light Contact” növündə italiyalı Marko De Franko və isveçli Ola Alvarssona qalib gələn kikboksçumuz 1-ci yeri tutub. “Kick Light”da isə italiyalı Kaloqero Simone, eləcə də isveçli Ola Alvarssonu məğlub edən Eduard Məmmədov ümumilikdə 11-ci dəfə Avropa çempionu olub.

Bu uğur münasibətilə Suraxanı rayon icra başçısı, Azərbaycan Kikboksinq Federasiyasının fəxri prezidenti Adil Əliyevə, Federasiyanın prezidenti Orxan Əliyevə, eyni zamanda Federasiyanın vitse-prezidenti Ramal Aslanova təşəkkür edən Eduard Məmmədov qələbəsini Zəfər Günümüzə həsr etdiyini bildirib.

Gənclər və İdman Nazirliyinə də təşəkkür edən Eduard Məmmədov Zəfər Günündə bayrağımızı dünya arenasında ikinci dəfə dalğalandıraraq himnimizi səsləndirməyin onun üçün böyük şərəf və fəxr olduğunu qeyd edib.