Eduard Məmmədov karyerası ərzində 28-ci dəfə dünya çempionu olub

Azərbaycan Respublikası Daxili İşlər Nazirliyinin İdman Cəmiyyətinin İdman-təlim şöbəsinin rəisi, polis polkovnik-leytenantı, dəfələrlə dünya və Avropa çempionu, “Ağ canavar” ləqəbli Eduard Məmmədov kikboksinqin WAKO versiyası üzrə dünya çempionatında tarixi uğura imza atıb.

“Master Class” kateqoriyasında 63 kq çəki dərəcəsində yarışan Eduard Məmmədov noyabrın 17-dən 26-dək Portuqaliyanın Albufeyra şəhərində keçirilən yarışda əvvəlki nailiyyətini təkrarlayaraq 2 versiyada qızıl medal qazanıb.

Təcrübəli idmançımız “Light Contact” növündə əvvəlcə Portuqaliya və Macarıstan nümayəndələrinə qalib gəlib. Finalda isə Böyük Britaniya təmsilçisindən güclü olub. “Kick Light” növündə isə əvvəlcə Hindistan və Qırğızıstan idmançıları, finalda isə Slovakiya kikboksçusu Eduard Məmmədovla bacarmayıb.

Beləliklə, qatıldığı 6 görüşün hamsında qalib gələn Eduard Məmmədov WAKO versiyası üzrə 8-ci, ümumən isə 28-ci dəfə dünya çempionu olaraq, Portuqaliyada 2 dəfə himnimizi səsləndirib.

Eduard Məmmədov bu möhtəşəm qələbəsi münasibətilə Milli Məclis sədrinin müavini, Azərbaycan Kikboksinq Federasiyasının fəxri prezidenti Adil Əliyev və Azərbaycan Kikboksinq Federasiyasının prezidenti Orxan Əliyevə təşəkkür edib. Göstərilən dəstəyə görə Gənclər və İdman Nazirliyinə də minnətdarlığını ifadə edən Eduard Məmmədov qələbəsini şəhidlərimizə həsr edib.