Gənc güləşçilərimiz U-17 dünya çempionatında uğurla çıxış ediblər

İordaniyada keçirilən 17 yaşadək güləşçilər arasında dünya çempionatında bir gündə iki idmançımız qızıl medal qazanıb.

Təmsilçilərimizdən 51 kq çəkidə çıxış edən Turan Daşdəmirov ardıcıl olaraq Hindistan, ABŞ və Qazaxıstan nümayəndələrinə qalib gələrək finala adlayıb. Həlledici görüşdə isə pəhləvanımız qırğızıstanlı Kutman Kalbayevi məğlub edərək fəxri kürsünün ən yüksək pilləsinə qalxıb.

Digər yunan-Roma güləşçimiz Ayxan Cavadov 60 kq çəkidə qızıl medalı ölkəmizin aktivinə yazdırıb. Mübarizəyə 1/8 finaldan başlayan Cavadov burada Ukrayna təmsilçisini məğlub edib. Növbəti mərhələlərdə Qazaxıstan və ABŞ təmsilçilərindən güclü olan Ayxan finalda gürcüstanlı Vaxtanq Lolua üzərində qələbə qazanaraq dünya çempionu olub.

Daha bir idmançımız 48 kq-da yer alan Əmrah Əmrahov isə Amman şəhərində təşkil olunan turniri bürünc mükafatla tamamlayıb.

Beləliklə, ümumən 105 xal toplayan yunan-Roma güləşi üzrə yığmamız komanda hesabında dünya çempionatının üçüncüsü olub.