“Gent” Konfrans liqasında uğurlu çıxışını davam etdirir

UEFA Konfrans Liqasının 1/16 finalında “Qarabağ”dan güclü olan “Gent” 1/8 finalda “Başakşehir”ə böyük hesabla qalib gəlib.

İlk görüşdə 1-1 hesablı heç-heçəyə razılaşan tərəflərin Türkiyədəki matçında 5 qol vurulub. Oyuna sürətli hücumlarla başlayan “Gent” fasiləyə 4-0 hesabı ilə irəlidə yollanıb.

Komandanın heyətində Qift Emmanuel Orban parlaq çıxışı ilə diqqət çəkib. 31-ci dəqiqədə ilk qolunu vuran nigeriyalı forvard sonrakı 3 dəqiqə ərzində daha 2 dəfə fərqlənib. Bununla da, o, UEFA-nın turnirlərində ən tez het-trik edən futbolçu adına yiyələnib.

Orbanla yanaşı, qonaqlardan Uqo Köypers qapını dəqiq nişan alıb. “Başakşehir”in gücü isə yalnız təsəlli topuna çatıb. 88-ci dəqiqədə Adnan Yanuzayın qolu yekun hesabı müəyyənləşdirib. Başakşehir-Gent: 1-4. Bununla da, 2 matçın yekununda 5-2 hesabı ilə üstün olan “Gent” 1/4 finala yüksəlib.