Güləşçilərimiz Avropa çempionatında ilk medalları qazanıblar

Slovakiyada keçirilən güləş üzrə Avropa çempionatında bir gündə 3 idmançımız medal qazanıb.

Təmsilçilərimizdən 57 kq çəkidə çıxış edən İslam Bazarqanov bolqarıstanlı İvaylo Tisova tam üstünlüklə qalib gələrək ardıcıl 2-ci dəfə qitə çempionatında bürünc mükafatın sahibi olub.

65 kq-da yer alan Əli Rəhimzadə ukraynalı Andrey Sviridlə görüşün əvvəlindən təşəbbüsə yiyələnərək sonadək üstünlüyünü qoruyub. Bununla da Ə.Rəhimzadə 4-cü dəfə Avropa çempionatının bürünc medalına yiyələnib.

Növbəti mükafatı yığmamızın aktivinə 70 kq-da mübarizə aparan Kənan Heybətov əlavə edib. O, 3-cü yer uğrunda qarşılaşmada dünya və Avropa çempionu İsmayıl Musukayevlə üz-üzə gəlib. Təcrübəli rəqibini 5-2 hesabı ilə məğlub edən Kənan fəxri kürsüyə qalxıb.

Beləliklə, sərbəst güləş millimiz 2-ci yarış gününü 3 bürünc medalla başa vurub.