Güləşçimiz Mariya Stadnik Olimpiadaya lisenziya əldə etdi

Ölkəmizin titullu güləşçilərindən Mariya Stadnik Paris-2024-ə lisenziya qazanıb.

O bu uğura Türkiyədə keçirilən Dünya Olimpiya Təsnifat turnirində nail olub. ƏMübarizəyə 1/8 final mərhələsindən start verən Mariya ardıcıl olaraq Çin Taypeyi və Belarus nümayəndələrinə qalib gələrək yarımfinala adlayıb. İdmançımız burada koreyalı Son Kimə məğlub olsa da, lisenziya uğrunda mübarizəni davam etdirib.

Növbəti görüşündə bolqarıstanlı Miqlena Selişkaya tam üstünlüklə qalib gələn güləşçimiz lisenziya uğrunda qarşılaşmada italiyalı Emmanuela Liuççini məğlub edərək Yay Olimpiya Oyunlarına qatılmaq hüququ qazanıb.

Qeyd edək ki, Mariya Stadnik karyerasında 5-ci dəfə olimpiadada iştirak edəcək. 35 yaşlı güləşçi daha əvvəl London-2012 və Rio-2016-da gümüş, Pekin-2008 və Tokio-2020-də isə bürünc medala yiyələnib.

Xatırladaq ki, M.Stadnik həm də ikiqat dünya və 10 qat Avropa çempionudur. Bundan başqa, o, Bakı-2015 və Minsk-2019 Avropa Oyunlarında, eləcə də Bakı-2017 və Konya-2021 İslam Həmrəyliyi Oyunlarında çempion olub.