Gürcüstan millisi ilk dəfə olaraq Avropa çempionatında

Futbol üzrə Gürcüstan yığması tarixində ilk dəfə Avropa çempionatının final mərhələsinə vəsiqə qazanıb. Komanda bu uğura pley-offda Yunanıstan seçməsini məğlub etməklə nail olub.

Tbilisi şəhərində keçirilən görüşdə 90 dəqiqə və əlavə vaxt qalibi müəyyənləşdirməyib.

Penaltilər seriyasında isə Gürcüstan futbolçuları daha dəqiq olublar. Nəticədə Gürcüstan millisi qitə çempionatının final mərhələsinə yüksəlib.

Almaniyada təşkil olunacaq AVRO-2024-ün daha bir iştirakçısını Uels və Polşa kollektivləri müəyyənləşdiriblər. Kardiff şəhərində baş tutan matçın əsas və əlavə vaxtında qol olmayıb. 11 metrlik zərbələr seriyasında isə Polşa futbolçuları 5-4 hesabı ilə güclü olublar.

Ukrayna millisi də qitə çempionatında çıxış etmək hüququ qazanıb. Polşanın Vrotslav şəhərində keçirilən oyunun ilk hissəsi İslandiya yığmasının 1-0 hesablı üstünlüyü ilə bitib. Ancaq fasilədən sonra Tsıqankov və Mudrikin qolları Ukrayna yığmasına 2-1 hesablı qələbə qazandırıb. Bununla da Ukrayna seçməsi AVRO-2024-ə vəsiqə əldə edib.