Hacı Əliyev və erməni rəqibi arasında qalmaqal yaşandı

Serbiyada keçirilən güləş üzrə dünya çempionatında titullu pəhləvanımız Hacı Əliyev və ermənistanlı Vazgen Tevanyan arasında 1/4 final mərhələsinin görüşü qalmaqalla bitib.

Qarşılaşmanın sonlarından əsəblərini cilovlaya bilməyən idmançıları yalnız məşqçilərin müdaxiləsindən sonra ayırmaq mümkün olub.

Qeyd edək ki, sözügedən görüşdə növbəti dəfə burnundan qan açılan Hacı yekunda zədələnərək mübarizəni erkən dayandırıb.

Xatırladaq ki, 3 qat dünya və 4 qat Avropa çempionu olan Hacı Əliyev yarışın startında çinli Şaohua Yuana qalib gəlib. 65 kq çəkidə çıxış edən pəhləvanımız 1/16 finalda Avstraliya, 1/8 finalda isə Monqolustan nümayəndəsindən güclü olaraq 1/4 finalda Vazgen Tevanyana rəqib olub.

Əlavə edək ki, sentyabrın 16-sı start götürən güləş üzrə dünya çempionatında ölkəmiz ümumilikdə 26 idmançı ilə təmsil olunur. Turnirə sentyabrın 24-ü yekun vurulacaq.