Heydər Əliyevin xatirəsinə həsr olunan beynəlxalq tennis turniri

Ulu öndər Heydər Əliyevin 100 illik yubileyi münasibətilə paytaxtımızda tennis üzrə beynəlxalq yarışa start verilib.

Bakı Tennis Akademiyasında keçirilən turnirin açılış mərasimində çıxış edən gənclər və idman naziri Fərid Qayıbov və Tennis Federasiyasının prezidenti Oqtay Əsədov ölkəmizdə digər idman növlərinə olduğu kimi tennisə də dövlət qayğısının ən yüksək səviyyədə olduğunu bildiriblər.

Daha sonra Beynəlxalq Tennis Federasiyasının İnkişaf Proqramlarının rəhbəri Vitor Kabral çıxış edərək yarış iştirakçılarını salamlayıb və onlara uğurlar arzulayıb.

Açılış mərasimi başa çatdıqdan sonra qonaqlar Tennis Akademiyasının ərazisində salınan padel tennis kortu ilə tanış olublar. Daha sonra tennis üzrə beynəlxalq turnirdə mübarizəyə start verilib.

Qeyd edək ki, Gənclər və İdman Nazirliyi və Azərbaycan Tennis Federasiyasının birgə təşkil etdiyi turnirdə 40 ölkədən 300-dən artıq tennisçi qüvvəsini sınayır. Artıq 12-ci dəfə keçirilən və mayın 28-dək davam edəcək yarışda 12,14,16 və 18 yaş kateqoriyalarında qaliblər müəyyənləşəcək.