Məhəmməd Salaha 234 milyonluq təklif

“Liverpul”un liderlərindən Məhəmməd Salah komandadan getməyə yaxındır.

Xarici mediada yayılan xəbərlərə əsasən, “Əl-İttihad” klubu ulduz futbolçuya görə rekord məbləğ ödəmək niyyətindədir.

Bildirilir ki, ötən yay M.Salahın transferinə görə 234 milyon avro təklif edən Səudiyyə Ərəbistanı təmsilçisi indi də bu məbləği ödəməyə hazırdır.

İngiltərə nəhəngi hücumçunun getməsinə razılıq versə, M.Salahın keçidi futbol tarixinə ən bahalı transfer kimi düşəcək. Bu baxımdan Neymarın 2017-ci ildə “Barselona”dan PSJ-yə 222 milyon avroluq keçidi hələ ki 1-ci yerdədir.

Qeyd edək ki, “transfermarkt” portalına əsasən, dəyəri 65 milyon avro olan Məhəmməd Salah 2017-ci ildən “Liverpul”da çıxış edir. Mersisaydlılarla müqaviləsi 2025-ci ilədək olan misirli futbolçu bu müddət ərzində 332 oyunda 204 qol vurmaqla yanaşı, komanda ilə Premyer liqa, İngiltərə kuboku və liqa kuboku, Çempionlar liqası, UEFA Superkuboku və klublararası dünya çempionatında qələbə qazanıb.