Millətlər liqasında 1/4 finalın oyunları keçirilir

UEFA Millətlər liqasının A liqasında 1/4 finalın ilk matçları keçirilib.

Milanın “Cuzeppe Meatsa” arenasında İtaliya və Almaniya yığmaları arasında görüşdə hesabı artıq 9-cu dəqiqədə Sandro Tonali açıb.

İlk hissə “Skuadra Adzurra”nın minimal üstünlüyü ilə bitsə də, “bundestim” 2-ci yarıda dönüş edərək 2-1 hesablı qələbə qazanıb. Komandanın qolları Tim Klayndiynst və Leon Qoretskanın aktivindədir.

AVRO-2024-ün qalibi İspaniya millisi yarımfinala adlamaq uğrunda Niderland futbolçuları ilə qarşılaşıb. Hesabı 9-cu dəqiqədə Niko Uilyams açsa da, hissənin ortalarında Kodi Qakpo tarazlığı bərpa edib.

2-ci yarıda da tərəflər hərəyə bir dəfə fərqləniblər. 46-cı dəqiqədə Tidjani Reyndersin qoluna “Qırmızı Furiya” son saniyələrdə Mikel Merinonun topu ilə cavab verib. Niderland – İspaniya: 2-2.

Split şəhərində Fransa seçməsini qəbul edən Xorvatiya komandası 2-0 hesablı qələbə qazanıb. Meydan sahibləri artıq 9-cu dəqiqədə qola yaxın olsalar da, Andrey Kramariç penaltidən fərqlənə bilməyib.

Bununla belə, fasiləyədək Ante Budimir və İvan Perişiç qonaqları oyuna mərkəzdən başlamağa məcbur edib. Qalan vaxtda başqa qol olmayıb və Xorvatiya matçdan qalib ayrılıb.

Portuqaliya millisini qəbul edən Danimarka yığmasına qələbə üçün 1 qol kifayət edib. 78-ci dəqiqədə Rasmus Höylund qapını dəqiq nişan alıb.

Qeyd edək ki, yarımfinalın iştirakçılarını müəyyənləşdirəcək cavab matçları martın 23-ü təşkil olunacaq.