“Neftçi” Azərbaycan kubokunda finala yüksəlib

“Neftçi” komandası basketbol üzrə Azərbaycan Kubokunda finala yüksəlib.

“Ağ-qaralar” həlledici görüşə vəsiqəni “Sərhədçi” kollektivi ilə mübarizədə qazanıblar.

“Sərhədçi” İdman Mərkəzində keçirilən oyunda ilk period “Neftçi”nin 31-22 hesablı üstünlüyü ilə yekunlaşıb. Növbəti hissədə “Sərhədçi” basketbolçuları daha ciddi müqavimət göstərsələr də, fərqi azalda bilməyiblər.

Qalan vaxtda da təşəbbüs “Neftçi”də olub. Üstünlüyünü getdikcə daha da möhkəmləndirən komanda qarşılaşmada 91-73 hesablı qələbə qazanıb. “Neftçi”nin uğurunda aktivinə 19 xal və 5 ribaund yazdıran Ceyms Haforn önəmli rol oynayıb.

Bu nəticə ilə finala yüksələn “Neftçi” kollektivi “Xəzri”yə rəqib olub. Kubokun sahibini müəyyənləşidərəcək qarşılaşma aprelin 20-si keçiriləcək.