“Pari Sen-Jermen” Mbappeni əvəzləyəcək hücumçunu transfer etdi

Son vaxtlar müxtəlif qalmaqalların mərkəzi olan “Pari Sen-Jermen” növbəti transferini reallaşdırıb.

Kilian Mbappe ilə yeni müqavilə baxımından razılığa gələ bilməyən Fransa nəhəngi “Benfika”dan Qonsalu Ramuşu heyətinə qatıb.

PSJ-dən verilən məlumata əsasən, 22 yaşlı portuqaliyalı hücumçu komandaya icarə əsasında qoşulub. Tərəflər arasında razılaşmaya görə, Qonsalu növbəti yay 80 milyon avroya tam olaraq Paris təmsilçisinə transfer olunacaq.

Qeyd edək ki, “Benfika” akademiyasının yetirməsi olan Ramuş əsas heyətdə 2020-ci ildə debüt edib. Tədricən 1-ci komandanın vacib üzvünə çevrilən istedadlı forvard ümumən “qartallar”ın forması ilə bütün yarışlarda 106 matçda 41 qolun müəllifidir.

Ötən mövsüm “Benfika” ilə Portuqaliya çempionu olan Qonsalu ölkəsinin millisində də aparıcı futbolçulardandır. 2022-ci il dünya çempionatında 4 görüşdə 3 qol vurması ilə diqqət çəkən Ramuş ümumən yığmada 7 oyunda 4 qolun müəllifidir.