“Prezident Kuboku 2024” reqatasının açılış mərasimi keçirilib

Ümummilli lider Heydər Əliyevin anadan olmasının 101-ci ildönümünə həsr edilən avarçəkmə üzrə “Prezident Kuboku 2024” beynəlxalq reqatasının rəsmi açılış mərasimi keçirilib.

Suqovuşanda təşkil olunan tədbirdə Milli Olimpiya Komitəsinin vitse-prezidenti Çingiz Hüseynzadə, baş katib Azər Əliyev, Azərbaycan Kanoe və Avarçəkmə Federasiyasının rəhbəri Vüqar Əhmədov və idman ictimaiyyətinin nümayəndələri iştirak ediblər.

Akademik avarçəkmə, kayak və kanoe üzrə turnirin açılışnda əvvəlcə Azərbaycan Respublikasının Dövlət Himni səsləndirilib. Ardınca iştirakçı ölkələrin təqdimatı baş tutub.

Qeyd edək ki, Azərbaycan avarçəkənləri ilə yanaşı, Almaniya, Türkiyə, Ukrayna və digər ölkələrdən olan idmançıların mübarizə apardığı reqata 4 gün davam edəcək. Ümumilikdə 21 komandanın iştirak edəcəyi turnirin son mərhələsi mayın 3-də keçiriləcək.