“Qəbələ” - “Qarabağ” matçında 3 qol, 2 qırmızı vərəqə

Azərbaycan çempionatında VII tura yekun vurulub.

Son qarşılaşmada “Qəbələ” və “Qarabağ” klubları üz-üzə gəliblər. Qəbələ şəhər stadionunda keçirilən görüşdə hesab artıq 2-ci dəqiqədə açılıb. Qonaqların heyətində Hamidu Keyta fərqlənib.

11-ci dəqiqədə “köhlən atlar” 2-ci qolu vurublar. Bu dəfə Nəriman Axundzadə rəqib qapısını dəqiq nişan alıb.

Fasilə ərəfəsində “Qarabağ” azlıqda qalıb. Kevin Medina birbaşa qırmızı vərəqə ilə meydandan qovulub. İlk hissə Ağdam təmsilçisinin 2-0 hesablı üstünlüyü ilə yekunlaşıb.

2-ci yarıda meydan sahibləri toplardan birinin əvəzini çıxıblar. Lakin Lukas Afrikonun qolu “Qəbələ” üçün sadəcə təsəlli olub. Oyun “Qarabağ”ın 2-1 hesablı qələbəsi ilə başa çatıb.

Qeyd edək ki, bu matç həm də Qurban Qurbanovun məşqçilik karyerasında 2-ci dəfə qırmızı vərəqə alması ilə yadda qalıb. Hakimin qərarı ilə razılaşmayan “Qarabağ”ın çalışdırıcısı 89-cu dəqiqədə texniki zonadan uzaqlaşdırılıb.